8月26日, 大寶正式踏入佢2x幾年嘅讀書生活~
第一日係十分之抗拒, 因為佢唔想離開 baba 喎,
所以一直死攬住唔放,
不過行行吓發覺唔多自在又自動落地,
其實學校之前都半年都每一個月開一次pg比佢哋熱身兼見見面, 好等老師同同學仔都熟絡d, 而大寶都幾喜歡, 因為只係玩同食~ 佢不知幾like~ 一日到黑都講話上呢間而唔上音樂班, 整到我都要再重新考慮仲讀唔讀音樂班, 話哂都唔便宜的......
著起校服嘅大寶即時大個仔咗, 仲乖咗, 好天使,
but 真實嘅佢實在曳到腰心腰肺.....
返學啦, 唔可以再扮細, 要有自己嘅八達通, 大寶十分之興奮, 搭地鐵成為佢每日必做嘅事啦~
細寶睇到哥哥睇風景又要學埋一份, 倆個不停你一句我一句咁, 傾到唔停嘴, 雖然細寶係外星話, 但都溝通到~ 勁!!!
暫時都係上一個鐘, 到下星期就正式3個鐘啦, 我知道大寶一定得嘅, 因為佢都唔係第一次返學啦, 所以我想佢一定無問題~
而每次返學時, 大寶第一時間都會同我講 " 好掛住你呀~ "
我知佢會掛住但明白要返學, 所以都開開心心咁同我講bye bye的, 一到放學就更加不停講掛住我哋所有人, 明啦, 明啦, 都係想我之後陪住唔好走開啫~ 知o架啦~
其實細寶都好掛住大寶o架, 每日佢一入門口, 就第一時間走去接門, 不知幾開心, 有時大寶同 baba 去咗街, 佢都會悶悶不樂咁, 雖然我係度, 只係可以止喊, 但明顯地係無咁多笑容嘅~
我想細寶係喜歡哥哥多於我.........
