摘士多啤梨上卷

 

 

12月5日, 星期日, 熱~~~

 

等咗成年, 終於都到大寶期待已久的摘士多啤梨季節, 今日真係又好天又舒服, 一大早就出發去大棠荔枝園開工摘個痛快~ 

初次揸剪刀嘅細寶, 完全無從入手去剪士多啤梨, 試咗幾次就放棄啦... 好無耐性呢....

 

 

反之個熟手技工, 唔幾1分鐘就有一藍仔收成~ 得得戚戚咁show比我哋睇, 細寶一睇見哥哥咁快手, 就更無鬥心... 放棄唔摘轉而走去散步,

 

 

 

 

細寶摘就幫唔到手了, 洗就好快手, 仲不停玩水, 而大寶就密密手咁清除d葉同莖, 倆個曳人係食呢方面真係好齊心, 其他嘢就成日打打鬧鬧,

 

 

 

大寶今日心情勁靚, 叫佢做咩都無扭扭拎拎, 乖仔到餵細寶食都肯~ 雖然細寶都係食唔到, 但肯去做都以經令我開心死了~~~^^

 

倆兄弟d表情似到呢.... 餅印~~

但原來倆個個頭頂轉係唔同方向的, 一個向左, 一個向右, 剛好大寶似baba, 細寶似我, 酒粒仔都係一個有, 一個無, 又分配得幾得意~ 哈哈~*v*

 

好味到個樣都特別甜~

 

到底隻手指好味d亦或d生果好味d呢, 點解5隻手指都要食埋???

 

 

 

 

唔係講笑, 倆個係咁食, 係咁食, 話咁快就食了2藍, 大寶好快手咁又出去摘了2藍回來, 呢位大汗工人真係辛苦哂~

 

 

 

 

 

 

細寶見大寶剪得咁開心, 忍唔住又再嘗試幫手啦, 睇住做, 小心試, 終於係大寶嘅示範之下, 細寶成功學會剪葉同莖啦, 大寶果然係佢個大偶像,

哼!! baba都只係小偶像咋~

 

 

自己落手落腳去完成, 食都食得開心d, 汗水係無白流嘅,

大寶, 凡事都要親力親為呀~

細寶睇你頭o架~

 

 

 

行山 @ 青衣自然教育徑 Tsing Yi Natural Trial

11月29日, 星期日,熱~ 熱~

今日大寶要求要陪婆婆行山,

好, 好, 一年一次, 希望你會慢慢愛上,

先食個豐富早餐就出發啦~

明明熱到嘔, 倆個仲要著到一隻糭咁.......超傻蛋.....

三個糭人..... 真夾呀~

未到行山處, 先在公園運動熱身一下, 熱到除下一件, 除下又一件, 見佢玩得咁開心, 以為大寶會無咩能量再去行山, 點知, 玩咗一陣就叫, 就趨我哋要快d上山摘野果,

行咗一陣, 突然後面來咗班消防員, 本來以為有咩大事發生, 因為不停又警察, 又救護員咁, 心諗要唔要返轉到呢, 但佢哋又無講要唔好行, 咁就跟住尾去八一八~

消防即係消防, 話咁快就行到第一個亭, 仲行埋到事發地點, 照睇又唔似有咩大事, 但就一大班人圍埋一齊, 唔知咩事呢??

終於, 行多一陣我都去到現場了, 原來只係有位婆婆頭暈唔舒服, 而老伯伯擔心就報警了,

單單只係有位婆婆不適, 就有6個消防員, 2個警察, 4個救護員, 個人覺得有d小事化大..... 但從我呀媽心中睇, 就係身在香港真幸福, 隨時都有人幫,

啱嘅, 啱嘅, 香港人, 是幸福的~

大寶熱到想剩係想穿底褲呀, 陰公, 至幣係我又大意, 無帶半心短褲, 好在佢拿住支樹枝, 左了了, 右了了, 不知幾寫意~

行到涼亭, 仲有3個哥哥姐姐係度玩沙~

免費娛樂, 2寶即時加入~

細寶初初不停用樹枝騷擾大家, 大寶及另外倆位哥哥都不停叫細寶去第2度玩, 唔好了散佢哋d泥沙, 好在, 姐姐有d仁愛之心, 叫細寶一齊玩, 細寶不至於孤伶伶,

所以幾時都話, 女仔真係細心d~

特別是先有姐姐, 之後係弟弟或妹妹都無所謂~

不過, 倆兄弟都在打打鬧鬧, 淚水加口水中建立到感情啦,

上次細寶行山都只係半歲, 話咁快就2歲啦~

今次行得好開心呀~ 仲學哥哥不停摘野果野花,

大寶的收獲~

今次雖然係細寶第2次行山, 但佢實際係行咗10分鐘到....

上山時, 在我背上嘻嘻哈哈,

下山時, 又在我背上呼呼大睡,

真識嘆世界!!!!

最後食埋大包就打道回府啦~

大寶手上呢朵小花竟然吸引到一位妹妹注意, 倆人不斷行吓又近d, 行吓又近d,

最後, 倆人仲手拖手行咗一陣~

仔呀, 你都好識氹女仔喎, 一朵小花就溝通到, 勁!!!!

而呢位小妹妹仲要係日本人添~

btw~ 次次行山都無baba份的~

所以呢次d靚相係出自我手的呀~ 呵呵~~~