圖書 ( 5 )

 

 

去完旅行返來, 第一件事唔係哂相 or 寫遊記, 而係為呀仔服務, 上網買新書,

 

 

其實佢愛睇圖書真係一件好開心嘅事, 但成日都要搵d得意而內容又幾好嘅書, 真的不易...

加上我一上網買嘢就會失控, 左買買, 右買買, 好易就買過千幾蚊, 呢頭買完中文, 轉頭又想補幾本英文, 唉.... 上網購物係好方便, 仲加快我銀包乾塘添....

 

 

呢期我同大寶就愛上一位日本作者 " 宮西達也 "

佢嘅書圖晝好精簡, 但內容十分之可愛同感人, 好多時都出人意表, 愈睇愈有意思, 本想買繁體版的, 但要 $50+ 一本, 我真係買唔起, 唯有繼續中淘寶嘅毒, 買買買,

熱愛海洋嘅大寶, 平時除了煲 " 藍地球 "之外, 還愛睇關於海嘅事 + 動物,

所以 [ 乒乒 和乓乓 ] 就係今期至愛書第 1 位~

 

 

 

第 2 位 " 小海狸 "

如果呢本係繁體字嘅書就好啦, 因為入面會介紹好多工具嘅名, 每個主題都係, 大寶睇得好投入呢~

 

 

 

第 3 位 " 不一樣的卡梅拉 "

呢系列都係一本好好笑嘅圖書, 我一見佢出新一輯就即刻入貨, 點知買到返來, 個大寶又望都唔望一眼, 奇???? 唔通佢要睇乒乒和乓乓睇到厭才轉另一本?? 觀察中~

 

 

 

第 4 位

有d似 " 十萬個為什麼 " 嘅書, 不過係幼兒版, 又有d似科學, 又有d似歷史, 不過都幾得意, 不出所料, 大寶又係只愛 [ 藍鯨 ] +  [ 象龜 ] 呢倆本....

 

 

 

最可憐的一套, 掂都未掂.......

唔通真係要睇到上面 d 書厭哂才到佢.....

 

 

本來仲有一套 " 黃金書系列 " 最衰就係來錯貨,

我要第 5 輯, 佢來第 1 輯, 結果就轉贈比表妹仔了~

 

 

2010年大阪．京都．城崎．鴨仔團@行程計劃

 

 

愛冷街嘅呀四, 身癢又心癢了,

身上嘅旅行根又在不停銡我啦..... 心思思咗半年,

終於係 11 月決定 2010 要去旅行郁一郁, 鬆一鬆~

 

由於 baba 嘅假期只得新年個幾日, 所以今次個旅費係有史以來最最最最最最最最最貴....... 以前我就專選淡季先去, 又平又唔多人~ 但睇怕呢幾年都無呢支歌仔唱啦, 而帶住 2寶就更加無得玩任性, 咩嘢特平簡陋民宿, 早 7 晚12, 血拼喪買, 暴飲暴食, 勇字行頭都要一 一收埋, 不過開心興奮指數依然高企~

曾經何時, 未有細路之時, 我常常掛在嘴邊講 " 做咩咁辛苦要帶埋 d 細路一齊去旅行啫, 佢哋都唔識, 又阻手阻腳, 又煩, " 不過做咗人呀媽之後就明白, 原來咁辛苦都係唔想自己一人旅行, 心掛掛, 玩得唔盡興, 所以上次同大寶去過一次旅行之後, 我就同自己講, 都唔係咁辛苦啫, 我又唔駛心掛掛, 而佢又開心, 而同平時去街又無咩大分別啫, 係!!! 無錯, 真係同平時去街無分別, 每個周日帶住 2 寶去街, 我都要帶齊以下用品, 包括有: 各 2 套衫做後備, 因為去親街都由早玩到晚, 係街食 2 餐, 以防佢污濁, 有多好過濕咗無得換, 5 條片, 濕紙巾 + 消毒用品, 毛巾幾條, 不論冬天夏天, 大寶一郁一跑, d 汗就湧住出, 小許藥, 水樽, 飯 wo for 細寶 2 餐粥, 食具, 小食生果, 倆位少爺下午茶無生果食會不停問我.... 唉, 所以同 2 寶去旅行和平時去街大志上無咩分別, 只係變咗去酒店瞓, 同埋, 咁辛苦帶佢哋去旅行, 都係想佢日後突然醒起, 原來同呀媽都去過呢度玩, 咁就咩都值得啦~ 老套 d 講句就係想佢有個美好回憶~ 哈哈,

講回今次行情, 上次去過東京, 無理由咁悶又東京, 雖則係 2 年前, 所以就選咗大阪京都啦~



但.... 點解又係日本呢? 就係因我貪小便宜, 日本好多設置都係由小童 4 歲開始收費, 就係咁, 大寶都未夠 4 歲, 當然要用盡此優惠啦~ 為咗一己私心想去玩, 咩籍口都有o架, 呵呵~

 

其實日本對我哋呢 d 有老 ( baba ) 有幼 ( 2寶 ) 嘅真係好啱, 安全得來又衛生, 因為 baba 都幾囉梳, 又膽心呢樣又膽心嗰樣, 而日本起碼唔駛驚有咩特別疫症要打定針, 只多咪攞定 d 平安藥睇門口就安心哂~ 加上細寶仲食緊奶, 日頭行行吓街想搵我開餐都好易有地方, 大商場通常都有育嬰室, 既方便又乾淨~  哈哈~



好~ 2 拖 2 , 又食又玩又倦之行, 出動~

日本!!!! 我來啦~~~

 

 

睇睇個行程先~



DAY 1 :

＃＃ 香港 >>> 日本大阪關西空港

早機 1020 CX506 出發, 下午 1440 到達, 帶住 2 件細嘅, 如無意外應該可以行特快通道, 上次去東京都係, 希望今次都係啦~ 今次我無 join package, 機票同酒店係分開 book, 所以好貴, 單單旺季附加費都成 $1200 / per , 加上大寶要小童票, 細寶要燃油費 + 稅, 4 個機票加埋就足夠我以前去歐洲個價兼有找.... 肉赤死.....

＃＃ 南海電鐵 >>> 難波 >>> 大阪南海瑞士酒店 ( スイスホテル南海大阪, Swissotel Nankai Osaka )

baba 千叮萬囑一定要瞓好 d, 所以住房方面又超支.... 我見機票都超支到爆燈, 洗濕個頭唔爭在沖埋個涼啦~ 今次選咗間中上價酒店, 因為上次貪平住普通雙人房, 3 條友瞓一張 double 床, 迫到身都轉唔到咁滯....

＃＃ 道頓崛 + 心齋橋 + 酒店

希望行得哂倆區啦, 如果我唔失常喪買嘢, 就由 e + 洗腦, 食緊要過買, 玩緊要過買, 睇過當買咗.....



DAY 2 :

＃＃ 黑門市場食早餐

基於酒店房價已超支, 咁就要係食方面慳返 d, 所以每日都要早早出門搵食~

＃＃ 海遊館 + 觀光纜車 +商場

據講呢個海遊館內有一條鯨鯊, 而大寶對所有鯊魚都十分之喜愛, 所以一定要去~ 但大寶已同我爭論緊呢條係虎鯊唔係鯨鯊, 真係有排坳呀....

＃＃ 天王寺動物園 / 通天閣 / 心齋橋 / 道頓崛

我哋又唔係跟團, 所以都好隨心吓, 到時睇吓係海遊館磨幾耐才再打算~



DAY 3 :

＃＃ 大阪 >>> 京都 >>> 京阪京都飯店 ( ホテル京阪京都 )

今日轉戰京都, 搬酒店~ 呢間酒店平大阪好多,

＃＃ 清水寺 / 2年板, 3年板 / 八阪神社 / 平安大宮

又行又買又要影相, 應該好忙~

＃＃ 祇園

希望見到藝妓~ 同埋要食甜品~

＃＃ 四條 / 河原町

買~ 買~ 買~ 食~ 食~ 食~



DAY 4 :

＃＃ 伏見稻荷大社千鳥居

見人影相好靚, 唔知 baba 有無佳作呢?? 比多 d 壓力佢先~ 哈哈~

＃＃ 嵐山 / 渡月橋 / 天龍寺 / 竹林 /

行程好緊迫吓, 有 d 走馬看花感...

＃＃ 金閣寺

世界遺跡, 一定要影張到此一遊相~ 哈哈



DAY 5 :

＃＃ 京都 >>> 城崎溫泉區 >>> 大西屋水翔苑 ( Onishiya suishoen )

今次旅程重頭戲, 上次浸唔到溫泉, 今次一定一定要浸))))))))))))))

要搭好耐車呢.... 希望倆隻曳人合作,

＃＃ 溫泉街 / 登山纜車 / 7個外湯

我諗我無咩機會浸哂 7 個o架啦, 1個都偷笑......



DAY 6 :

＃＃ 城崎溫泉 >>> 京都 >>> 關西空港 >>> 香港

唉.... 最後 1 日, 都預計到係唔捨得, 唔願意, 唔開心, 不過假就得 6 日, 想賴死都唔得........ 日本!!!! 我會再來o架!!!!!!

** 相關網址 **

訂機票 : 萬福旅行社 HERE

網上教學 : 開樂天acc HERE

大阪酒店 : スイスホテル南海大阪 HERE

京都酒店 : ホテル京阪京都 HERE

城崎酒店 : 大西屋水翔苑 HERE

玩樂 : 大阪海遊館 HERE / 大阪天王寺動物園 HERE / 黑門市場  HERE /  通天閣 HERE / 清水寺 HERE / 伏見稻荷大社 HERE /



** 搵料網站 **

日本國家旅遊局 HERE

京都市觀光文化情報 HERE

城崎溫泉 HERE

JR 西日本 HERE

東橫 INN HERE

嵯峨嘢觀光鐵道 HERE

京福電氣鐵道 HERE

南海電鐵 HERE

國泰航空預辨登機 HERE

機場快線 HERE

預告完畢

收看~

★ DAY 1 + 2, 大阪．景 ★

★ DAY 3, 京都．清水寺 ★

★ DAY 3, 京都．景．街角 ★

★ DAY 4, 京都．伏見稻荷大社 ★

★ DAY 4, 京都．嵐山 ★

★ DAY 5, 城崎溫泉．景 ★

★ DAY 5, 城崎溫泉旅館 ★



◇ 2010大阪京都鴨仔團．錯漏百出 ◇ DAY 1

◇ 2010大阪京都鴨仔團．上天下海 ◇ DAY 2

◇ 2010大阪京都鴨仔團．鴨走天涯 ◇ DAY 3

◇ 2010大阪京都鴨仔團．賞心悅目 ◇ DAY 4

◇ 2010大阪京都鴨仔團．飲飽食醉 ◇ DAY 5

◇ 2010大阪京斬鴨仔團．滿載而歸 ◇ DAY 6