連日來, 大寶都好似保標咁痴住細寶,
不論係食奶, 換片, 瞓覺,
大寶都會靜靜地坐係旁邊睇住, 陪住,
有時仲情不自禁咁講 " 我想拖吓細寶隻手仔呀?"
有時又講 " 我想同佢一齊瞓, 好無呀?"
有時又講 " 我想錫啖呀, 得唔得呀?"
而當我將細寶隻手仔, 摸返大寶塊面時, 仲會笑得好甜添~
不停要求細寶摸佢, 之後自己又錫啖細寶, 如是者不停重複又重複, 不過我哋3個又玩得好開心喎~
每次大寶係旁邊講話, 笑呀, 細寶都會轉去大寶個處, 雖然知道係追聲嘅行為, 但睇到佢倆個你眼望我眼時, 大寶個種傻笑表情, 我個心都會好甜~
每次想影呢d相時, 大寶都會左閃右避, 難得baba今次影到~
大寶肉緊到成個人飛埋來錫~
呢個曳人又係表情多多~
雖然大寶好想好想同細寶玩,
但係以大寶咁粗獷嘅行為,
我睇..... 倆兄弟一齊玩都係再等一吓添啦~
所以每日baba回家都要陪佢玩, 而我就照舊餵奶, 換片, 餵奶....
由於大寶已經無返學啦,
所以我早上一有時間都會陪吓佢睇圖書, 講故事, 玩玩具,
近日發現大寶出現一d奇怪言行.....
如我一想叫佢執玩具時, 都未開聲咋... 大寶已不停講 "對唔住"
雖然係好好, 會講對唔住, 但就唔行動......
又如佢想baba抱佢, baba只係講抱咗好多次啦喎... 佢又講 " 對唔住 "
我叫佢埋枱食飯, 佢又講 "對唔住"
晚上我叫佢去瞓, 佢又講 " 對唔住"
我開始覺得奇怪, 以前大寶會講咩原因唔做, 如我想玩多陣..
唔食, 因為我想食麵唔食飯...
唔想瞓, 因我想睇一次圖書...
點解想抱, 因我掛住你...
但e+就只會講 "對唔住"
我想是學校既原因, 因我知道大寶食飯食得慢, 又有要求, 佢要送同飯分開, 瞓覺要人抱一陣, 我知呢d都係我養成嘅壞習慣, 但學校只令佢不停講對唔住, 就唔係我想得到嘅嘢....
而鬧完佢之後, 大寶每次一喊, 我去抱佢, 佢就好驚咁講 " 我收聲o架啦, 唔喊啦... " 我聽到好唔開心, 因為佢以前會喊哂出來, 之後再同我講番 "媽咪, 我唔會啦, " 仲會好肉緊咁抱住我, 但e+就只會忍住, 唔敢發洩出來... 呢d都唔係我想學校比佢嘅感覺,
所以心情有d唔低落, 心想...... 2歲幾返全日, 都係未是時候, 下年還是選半日校吧.....
