近日, 發覺大寶既口頭禪多咗好多好多,
我就盡量記下吧~
1) 每當唔開心就會"Q"埋雙手講 " 我唔開心呀!! " 其實只不過係我幫佢執緊玩具 or 我睇緊報紙, 無理佢5分鐘到既時間,
2) 我大聲命令佢要執玩具啦, 就會豬咀加詼詼氣氣講 " 做咩咁大聲鬧我啫!! " 吓...... 咁叫鬧你咩??
3) 我地唔小心整親叫哎呀時, 就會拍住我地膊頭, 溫柔地講 " 媽咪~ 你好痛痛咩?? " 我心諗你來羅景定贈興呀??
4) 當我地在書枱寫緊字, 佢係都要坐在我地腳上時, 而佢又要寫埋一份,
好啦, 咁一齊寫啦, 但我地張紙阻到佢時就會好正經咁講 " 媽咪~ 唔好阻住我做野啦, 我好忙呀!! " 吓.... 好似係你阻緊我喎??
5) 自己係屋度走來走去之後, 會攤在梳化上一路講一路抖大氣咁講 " 我好倦呀, 唔好煩我, 吓~ " 吹漲, 真係聽到都想打巴佢.....
6) 當我地好忙咁趕出門口時, 就會得得戚戚咁講 " 你地好趕呀?? " 咪就係你個臭豬慢吞吞, 攪呢攪路整到我地遲到lor, 仲好講!!!
7) 仲有就係所有問題都加個 " 咩 " 字, 好似 " 咩o黎o架? " 我答 " 電話呀 "
又問" 咩電話o黎o架? " 我又答 " 打出打入同popo傾計既電話呀 "
再問 " 打咩popo電話呀?? " 我再答 " 你日日用來打比popo既電話呀, 你一句佢一句, 咁呢~ "
又再問 " 咁咩你一句,我一句呀?? " 細路, 係咪玩野呀?? 開始有d 想唔彩佢兼想打暈佢既衝動, 但都再要答多幾次... 終於忍唔住要拉開話題, 引佢去其他野才可甩身,
8) 當我地食緊野唔理佢時, 就會講 " 你地做咩啫?" 其實又係佢自己唔食, 但個心又想我地都唔好食就會咁講啦, 之後又會同( 7 )一樣, 開始無止境地問啦, 務求令到你快d食完同佢玩...
9) 同佢夜晚瞓係床時, 會轉來轉去扮好委屈咁講 " 我瞓唔著呀~"
每晚都講幾次既, 但我一講 "咁我瞓先啦, 你自己轉多一陣好瞓啦吓" 佢即時會答 "咁我都瞓啦" 真係激到噴血呀!!
但之後又好sweet咁同我講, "錫啖啦, 攬住瞓啦吓~
寫吓寫吓發覺大寶既口頭禪出現率最多既係 " 咩 " , " 啫 " , " 呀 " , " 啦 " , " 吓 ",
仲有就係發現佢既口頭禪就係我平時對佢講既野, 天呀!!! 真係我既迷你版呀!!
