細寶~2個月大!!

 

細寶 : 2個月, 重 : 5.35公斤, 高 : 57.5cm,

 

 

食食食 :

食奶依然係3-4個鐘一餐, 不過就每餐食5-10分鐘, 比上個月快咗好多, 都唔知佢到底係啱啱夠? 一般飽? 定係8,9成飽? 好鬼擔心... 

有小小動搖添, 係咪我唔夠佢食呢?? 佢會唔會唔夠都照瞓呢?? 但姑娘話重咗1公斤都ok, 而每日又有便便, 唔駛擔心咁話, 唉... 話雖如此, 但一對回呢d細b, 又變回新手咁, 每事擔心每事問, 哈哈~

雖然我係老奶媽.....

 

 

柯柯柯 :

去ng ng就由一日幾次變為e+嘅1日1-2次, 不過比較浠, 唔知係咪食得太多前奶呢?? 不過...無再係半夜三更去ng ng啦, 好嘢~  而我接ng都接得幾成功~  每次都用到痰罐, 哈哈!! 接"金"呢樣嘢, 我真係幾得~

 

 

瞓瞓瞓 :

而瞓就開壞頭啦.... 日頭點都要我揹先肯瞓, 夜晚先瞓床仔... 好煩....

初初瞓覺, 特別係半夜, 細寶係超多聲音, 不停呀~ 唔~ 呀~ 咁....

個頭仔轉一轉又呀~唔~  隻手仔伸一伸又唔~呀~  隻腳仔郁一郁又呀~唔~  打呵欠又呀~呀~  連放個屁仔都要唔~唔~   笑死我....

初初唔習慣, 成日以為佢喊叫我, 不停起身望吓睇吓, 整到我緊張到死, 後期... 唔理啦, 一日未聽到佢大喊都唔起身呀!! 嚴重唔夠瞓會好忟o架......

近呢一倆個星期已經好咗好多, 夜晚已無再咁多聲氣, 萬幸~

不過扭眼瞓時就會喊得好悽涼, 出盡力咁喊完就"呵~"咁扒係我心口... 瞓咗....

 

 

玩玩玩 :

日到放在床仔時, 好似知道得自己一個係房咁, 不停"啊~" "eh~"咁叫你, 當我一應佢來啦~ 佢就"呀~"咁應返我, 好得意,

每朝起身, 又要搵人同佢傾吓計, 叫佢個名就最鍾意啦~ 仲口郁郁想講嘢咁~ 有時心情好仲會笑添, 表情多多, 古古惑惑, 真係整懶人呀, 邊得咁多時間同佢傾計呀!! 曳曳豬~

 

 

喊喊喊 :

強項, 不過唔係無理咁喊,

片片濕得滯, 換片換遲d....喊!!!  食奶食遲d....喊!!!  叫你啊完又啊, 唔應佢....喊!!!

扭眼瞓未揹得切....喊!!!  係床無人陪, 悶悶地....喊!!!   

大佬寶無o拿o拿大叫, 嚇一嚇....喊!!!   起咗身無人理, 無人抱....喊!!!

特別係今日打完針, 更係喊完一次又一次, 好似一醒起個大脾仔痛痛, 就唔理係食緊奶定瞓緊, 都大大力咁喊.... 好一個大喊十