大寶~2歲8個月

講完細寶, 又寫下大佬寶近況先,

大寶 : 2歲8個月, 體重 : 27磅, 身高 : 93cm

 

 

~ 食 ~

開始自己"不"飯, 麵, 算係一大進步~

一日倆碗飯+多多送+多多多生果 (同我同一類人, haha~)

最愛食依然係魚, 有大眼魚, 鯇魚, 沙錐魚, 黃花魚, 獅頭魚, 其次係雞翼, 薯仔, 節瓜, 芝士腸, 肥豬肉, 豬扒, 同任何生果...

 

 

~ 瞓 ~

仲係要人陪住才肯入睡, 午睡2個鐘, 晚上就一定要聽幾個故事才肯瞓落床, 10幾至第日嘅8點幾..

係張床度就瞓到打風咁, 不停轉來轉去無時停...

 

 

~ 柯 ~

日間去sh sh, 通常都唔出聲, 要我哋拖住強迫先肯柯, 都唔知點解要同自己個腎作對...

去ng ng 就一定會大叫 "我肚仔唔舒服" 來通知我哋, 又係唔肯坐痰罐同廁所...  要加多幾錢肉緊迫佢學先得啦.....

晚上介咗片啦, 但要起身去2次sh sh, 好彩有細寶做人肉鬧鐘, 勤力d都可以力保不濕~ 

 

 

~ 玩 ~

可以自己玩半個鐘以上, 最愛玩意依然係廚房仔, 切所有真實蔬果, 薑, 蒜頭,

自己睇圖書, 砌火車路, 打保齡球, 爬我哋d腳當係sir滑梯, 咕我哋頸當轉飛機, 係地下轆來轆去當打摔交.... 自得其樂!!!

每日歡樂時光就係去公園踏單車, 兼同周圍嘅哥哥姐姐傾計, 會好主動咁同人講 " 我哋一齊玩啦? " 毫不怕羞, 哈哈~

 

 

~ 講 ~

有時心情好又會自己坐埋一2邊睇圖書, 仲學講故事比我哋聽, 都好比心機o架, 雖然係一節節, 斷斷續續, 但d想像力都幾天馬行空, 估佢唔到... 

好似今晚咁, 睇新聞講太空人訪港, 佢即時拿本太空人圖書同我講 :

呢個咪係電視入面個哥哥lor, 佢o黎咗我本書度啦, 你睇, 你睇 (指住本書個太空人) ,

係咪同我一樣, 叻叻做到太空人呢? (佢成日以為自己識跳高就係太空人.... )

我今晚就飛去月亮度啦, 你睇, 你睇 (指住個窗, 同時搵緊個月亮, 但搵唔到...) ,

咪就係個度lor , 我帶埋d提子去探太空人呀~ (因我食緊提子) ,

咁佢就會比糖我啦! (當佢乖時, 我會賞糖比佢)       <<完 >>

當佢講完一次之後, 我以為佢會轉話題啦, 點知又講第2次, 內容大同小異都係太空人, 但就加插咗其他人物, 如婆婆, 細寶, 姐姐...

 

 

~ 行為 ~

會無理發脾氣, 會因唔合心意出手打人, 但唔理佢一陣就會慢慢冷靜...  之後同佢講道理都會聽, 但隔幾日又會出現, 真係道理依舊, 行為照舊...  但我知係反叛期嘅必經階段, 忍, 忍, 忍, 耐人教, 唔好出手, 忍, 忍, 忍......

喜歡笑, 自己開心~笑!   

我哋睇電視笑又陪笑! 

我哋笑佢d傻瓜行為又傻笑!

我愛你笑o架, 大寶~ 笑多d~