~ * 懶楊楊屋舍 * ~: 10月 2008

2008年10月29日星期三

成績表

1個月大啦~

健康院嘅成績表出來了, e+重8.8磅,

真係..... 有d bb出世都有呢個重量啦....

不過全人奶來講, 算不過不失~

來~ 睇吓呢隻細豬仔嘅肉照~

我唔講....

大家分唔分到邊個係大寶? 邊個係細寶? 哈哈~

2008年10月28日星期二

日與夜

唉.... 做呀媽真係辛苦...

點解咁講呢??

就係因為,

baba早幾日夜晚吞pop, 唔幫手揍仔, 走了去影夜景,

而我就呆在家.... 餵奶, 換片, 餵奶, 換片, 餵奶, 換片....

不過今日,

我都唔執輸, 晨咁早6點幾餵奶之時, 見個天色咁靚, 拿拿淋影咗幾張日出彩霞~

睇住個天由黑變紅, 紅變黃, 黃變白, 白變藍,

心情好舒服~

嘻嘻~ 呢倆張就係baba影嘅佳作,

不過... 我就覺得未到家~ 哈哈~

轉貼-小朋友大脾氣點教

係今個月內, 眼見大寶有時會無理打人, 又會亂拋玩具, 有時更會因小事就大喊一餐兼瞓係地...

唉... 好彩就係呢d情況一日只出現1, 2次, 亦都無在街外發生過,

當我每日餵奶時, 就不停諗..... 點解d脾氣突然間會大咗咁多??我應該點改善反佢,

於事就比我搵到呢個topic, 入面有位SandraLo負責解答我哋眾多媽咪疑問, 我近排就不停追post, 努力當中,

發覺佢教嘅2大方法十分見效, "讚" 同 "ignore不理會" 好有用~

e+我一見大寶玩得開心時, 就會讚佢 "今日好乖, 無打人呀~"

同佢睇圖書時又會讚佢 " 大寶好乖, 好叻, 好似書入面d哥哥姐姐咁, 知道要愛惜玩具, 無亂拋啦~"

而我嘅重點 "讚" 就在食呢方面, 好似尋晚咁, 佢好乖咁在飯桌上面食飯, 咁我就讚咗佢2次, 最尾仲可以在半個鐘食哂, 咁我又大讚佢2次, 佢好開心, 不停讚自己叻叻, 試過有時心情好, 仲會自己食哂一碗仔麵添,

見到有小小成績, 令我更加要加油!!! 因為問題唔止呢幾個, 仲有瞓呀, 有時唔多肯應人, 同唔肯主動去廁所, 等等...

轉貼 : 親子王國~小朋友大脾氣, 可以點教

SandraLo "其中幾大要點"

(1) 而家d 媽咪太錫小朋友，俾好多時間佢地，即使冇好多時間嗰啲，都盡量遷就，同時間，媽咪嘅情緒亦極度容易被牽動，變成非常「互動」！
什麼是「互動」？我解釋為痴纏、互相影響同牽制雙方，一方動，另一方冇法靜！
「話」人呢樣嘢，係十個人十個都會中招，點解？因為我地自己細個時，阿媽都係咁「話」我地，我地被話十次，總有三次都係聽，便形成咗呢個「話」的文化，自己都係「話」大或者打大，當然話/打番自己嗰件。但時移世易，小朋友已經唔怕阿媽話同打，話得多，重慣咗，唔聽，甚至駁嘴，咁阿媽就重興，愈話愈嬲，愈嬲愈話，升級再鬧勁啲或者作警告式的話：你再唔XX我就咁咁咁做！但好可惜，呢個好多時只係一時之氣同想嚇佢，阿媽諗吓就知並不是想真係做，於是又變成講咗冇做，而阿仔亦好快咁洞悉個遊戲點玩，一係就知阿媽只係靠嚇，唔會真係做，所以可以 ignore阿媽，唔係就俾足反應阿媽，喊住咁叫佢唔好，話下次唔敢，阿媽當然無法抗拒呢種認錯嘅「好態度」，如是者，互俾反應、打完場之後，下次又照板煑碗，知錯但唔改，當之前嘅嘢冇發生過，就是這樣，不停的「互動」，不停的重覆！如果一個唔好彩，條靚重識講：媽咪你都唔錫我嘅！咁就重「腰」中阿媽個心，完全無法抗衡，唔識處理！

解決方法：唔好「話」，將言語糾纏減到最少，同時要言出必行。

(2) 不少媽咪都話用 ignore 呢招，但實際上冇幾多人做得到，有啲就只係唔即時fulfil 個仔/女嘅要求，「話」吓佢地就當 ignore 咗，咁當然係唔 work；点解咁難？因為呢個係人嘅「自然反應」，叫唔係應囉，点解要唔俾反應？但係喊呢樣又係bb嘅「自然反應」嚟喎！？佢地未識講嘢個陣就用喊嚟表達，大大吓，發現一喊就有人理，同埋有好多 offer，咁梗係有理冇理喊咗至講啦！如是者，喊喊吓慣咗，阿媽唔即時俾我就唔啱啦，咁梗要升級啦，喊勁啲兼瞓落地囉……… 你唔想佢瞓地就唯有乖乖就範，咁下次，必然食過番尋味，有地瞓地，有啲阿媽知道咁落去唔掂，但又以為個仔真係「傷心」，又以為已經ignore過，重問唔係咁可以点…… 事實上小朋友喊，90%都唔係代表傷心，只係代表要求！

解決方法：媽咪 ignore 小朋友無理的要求時，唔須要表現嬲或唔開心，更加唔係鬧或者話，而係好和平咁俾一個訊息佢：呢樣嘢唔得就唔得，阿媽唔會因你嘅喊(或其他瞓地、扭、掟嘢行為)而改變！

(3) 好多媽咪讚時「就住就住」，怕讚壞；其實讚佢一個好嘅行為讚得多係唔會有問題，讚得多亦唔會自大，只會自信，因為係讚佢「一個好嘅行為」(例如有禮貌讚得多唔會變冇)，而唔係讚一種能力，如果你讚佢捉棋或讀書叻，佢未識比較，讚得多以為叻哂，咁就唔止自大(自己以為自己好醒)，到輸嗰時重好傷添！
除咗「就住」，重好容易响錯嘅時間讚，發揮不到原來的功效，例如試圖响佢發脾氣時話：bb好乖唔扭嘅；咁係冇用，又或者响讚時附加條件，例如話：你好乖喎如果可以XXX我就獎你啦 – 咁讚法就大打折扣，因為佢攞唔到「被讚」嘅甜頭，亦唔覺得呢個係你心目中嘅好行為，乜嘢係好行為嘅信息唔夠清楚、强烈，亦即係話你冇用到讚去 reinforce/ encourage佢去繼續呢個好行為！

解決方法：學識点讚

(4) 打 – 大家都明白唔好打，因為你打佢佢又學咗打人，可以打到幾大？到佢大個時係唔係可以打番你一鑊勁？我覺得偶一為之(尤其是bb唔知危險嗰啲)，並非一定唔得，但如果要打，就一定要痛，重係好痛，否則唔好打！有啲媽咪/阿婆，好鍾意話打，慣手勢咁「撻吓」，就係最錯嗰隻！初初「撻」時，bb好似都驚，但好快就「還拖」，因為佢原來只係怕媽咪嬲，而唔係怕打(因為唔痛)，到佢覺得自己重嬲過阿媽嗰陣，就打番轉頭！

解決方法：真係決定要打時，唔好嬲或者有情緒，要好平靜，講咗就要做，打親就要痛！
打過一次有效，唔好吓吓話打嚟嚇佢，如非必要，唔好再打，或者咁啦，一年最多打一次，重要唔好响其他人面前，要隻抽！