夜景

 

近來都好少時間寫2寶近況..... 太懶啦..........

不過baba就好勤力...... 去影相,

分享吓佢 d 劣作~

大家覺得如何呢?? 可以盡彈盡插~ 呵呵@@

 

 

 

 

 

 

 

 

 

 

 

 

 

 

 

 

 

 

MICHAEL JACKSON'S " THIS IS IT "

 

 

11月6日, 去咗睇 MJ THIS IS IT,

 

好值得去戲院睇~

睇完有D感觸感想.....

 

一位音樂天才, 舞台王者, 雖然負面新聞成本字典咁厚,

但依然有咁多擁護者, 對佢不離不棄,

是天意要佢試煉人性嘅倆極, 亦或人為??

是成名必須附加嘅醜聞定律, 亦或真有其事??

種種都無答案......

 

但睇呢套戲時, 我只睇到一位愛音樂, 愛地球, 愛人嘅表演者,

佢係幾咁投入, 付出嘅汗水, 精力,

都值得我哋去支持, 去欣賞,

 

套戲只會上演 2 星期, 去戲院感受一次吧~

 

 

睇戲之前, 2個人去食咗個豐富晚餐~

" 王家沙 "

6樣送食青光~ 都咪話唔大食~

 

1. 醉雞~

好香酒味嘅嘉美雞, 講真, 我都係第一次食嘉美雞, 又真係好有雞味同好滑, 不過平時要成$200隻, 就真係食唔起啦....

 

 

2. 蟹粉小龍包~

的確好好味, 比普通小龍包味濃, 唔知係蟹粉關係亦或味精呢??我只敢食一個, 好驚對細寶有影響, 不過諗深一層, 一個包又有幾多蟹呀??

 

 

3. 酸辣湯雲吞~

酸酸辣辣好醒胃, 無咩特別~

 

 

4. 糯米飯宵賣~

比糯米卷易入口, 唔太滯~

 

 

5. 黃金蝦~

BABA 至愛, 咁高膽固醇... 我睇你幾日變大肥佬...

 

 

6. 河蝦燴倆麵皇

一般貨色, 2 個人食真係好飽.....

 

細寶13個月

 

話咁快, 細寶已經 13 個月大啦,

咩都唔同哂啦~

記得上個月佢磅重, 都只係 16-17磅到, 係細細碼,

都係個句啦, 健康就心足,

我已接受咗佢倆個係咁奀之之, 唔長肉o架啦.......

而我嘅1歲目標都達標啦, 來緊我會試比小小奶粉, 至於食唔食就睇佢啦, 我依然都會繼續餵, 話哂都最後一次啦~ 隨緣吧, 食到幾時就幾時啦~

 

 

 

記一記近況先~

 

食 :

早, 午, 晚 3 餐都食得ok~

好喜歡食大眼魚, 3 個字就搞掂一碗大人碗粥, 叻過大寶多多聲~ 同時都好喜歡粉麵,

喜歡食菜心, 係一條條咁食,

不過都唔及食大寶d飯美味, 但凡大寶開飯, 點都要食返3, 5, 7 啖先心熄....

又是一名生果皇, 下午荼時間無生果不歡, 不過都有喜好, 暫時最愛香蕉 & 蘋果,

 

 

 

玩 :

好貪玩, 大寶玩咩佢玩咩, 識得推住o架車仔周屋走,

又學大寶爬來爬去, 最愛飯枱底探險, 又愛用腳 " 了 " 玩具,

手指幾靈活, 識玩積木, 小物品都手到拿來, 得心應手, 特別係小食星星餅, 最近至愛提子乾~

為咗玩可以唔瞓午睡.....   為咗玩可以唔穿尿片....  為咗玩可以食得好快.....

 

 

 

講 :

第一個識講嘅字係 " 曳 " 因為我哋同大寶講得太多啦, 所以細寶第一個好清楚咁講到嘅單字係 曳~ 曳~

都識叫  ba, 飽, 奶, ma, 終於都有我出現啦, 超開心~~~

個嘴仔仲識得發惡 b li ba la 鬧人,

識得玩脷, o得 o得聲~

合嘴, baba 咁boo 氣~

不停豬嘴噴口水~

仲識打開手表示無, 開開合合d手指講 bye bye,

手仔放嘴前玩 "ｏ" 時順手做埋飛吻~   

 

 

 

 

瞓 :

公雞一名, 每朝必定 7 點前起身,

無街去嘅平日會瞓早, 午倆轉覺, 有街去就唔瞓午睡.....

夜晚 9 點就想搵自己床發甜夢~

作息都ok啦~