奔波返學的首2天

9月2日

終於都等到開學日啦,

今日大寶被安排在下午3點-5點呢段時段上堂, 一連2個星期嘅適應期就開始啦~

慶典今日大寶早早食了午餐, 係屋企仲小睡了1個鐘, 但就要我抱佢返學, 在下午3點半都終於到達學校了, 一如我所料, 是遲到大王@@~

由於只可以由一位家長陪同上課, 婆婆唯有在門外做觀眾,

不知是不是啱啱瞓醒嘅關係, 大寶一直都係呆呆咁企係度睇人玩, 仲要我拖住先肯行去周圍睇周圍望, 不過唔駛半個鐘, 就開始生猛哂去踏單車, 去爭車仔, 不過最吸引佢嘅竟然係圖書角, 我同佢一齊睇咗5, 6本圖書, 直到老師叫大家入課室聽故事才肯放過我......

 故事時間

大寶一直對聽故事都好投入嘅, 所以今次都唔例外,

早早就坐係老師前面等開始啦~ 雖然各個小朋友都郁來郁去無時停, 但大寶都無受影響坐定定直到老師講完,

希望日後都係咁就萬幸啦~

 

自由活動時間

聽完故事就小休一陣, 正當大家都在課室玩玩具時, 大寶就走了出去玩車仔, 去其他班房睇人上堂, 完全係無紀律可言.....

而我都睇得出, 大寶係想同d大哥哥姐姐玩多過同同班嘅小朋友玩, 唔知點解佢近排都愛痴大過佢嘅人玩, 同差唔多大嘅就玩唔埋, 不知關唔關自我意識增強??? 渴望長大事呢???

 茶點時間

簡簡單單嘅茶點 "果醬手指餅"

但大寶食得好知味~

食完一條又一條, 就算無餅仔都想食埋d果醬!!

朋輩嘅影響真大!!

 放學啦

正當我心想大寶可以無驚無險過渡2個鐘之際.....

大寶失手了  sh sh 了...

唉....... 是我太輪盡, 慢手慢腳令佢失禮於人前, 係我嘅錯......

 

 

總結來講, 學校嘅老師算是細心, 只是學校真的是細了點, 但安排每班輪流用遊戲設置都可以,

只是今日2位老師對10位小朋友都有d拿手唔成世嘅感覺... 如果日後無家長, 而又正常地2位老師對20位小人仔, 情況會唔會好混亂呢? 我是最膽心呢樣,

加上學校同屋企真的很遠.... 大寶每日咁搭車會很辛苦的, 所以我都要再認真考慮清楚.....

 

 

 9月3日

經過昨日一戰, 今天我已無力再抱佢返學了,

轉由姐姐孖婆婆2人出發, 而今日比尋日還累,

因為無時間比大寶瞓覺, 一搭地鐵就瞓咗... 姐姐由家抱到去到學校都唔願起身, 迫於無奈在課室外坐了1個小時, 正當婆婆想放棄回家之際, 個曳人又彈起身唔願走了,

婆婆唯有厚住面皮問老師明天可唔可以轉為早上來上課, 好彩老師都肯安排, 明天就有另一挑戰, 早起兼快食食早餐, 所以明天又會轉回由我上陣,

唉, 真是又辛苦了又奔波...