2014年, 9月7日, 星期日, 熱, 曬, 有風
早上8:30準時在馬料水坐船出發去塔門~
由屋企飛的去馬料水都只是20分鐘, 好快呢~~
**
是日是中秋前夕的周日, 好多菲, 印的姐姐都坐船去玩,
有釣魚人士, 行山人士, 而最多的是露營人士,
所以船上剩餘位置不多, 加上大多的人都無公德心, 背包, 用具放在椅上而不是地上,
我們好不容易得熱心男士讓出4個位給我們, 婆婆要自己顧自己~~
中途見到有水警在海上設防走私圍欄, 日光日白都有走私???
船長講, 咩時段都有架, 多數是走私羅漢松, 植物呢類,
雖然我行山資歷尚淺, 但間唔中都見到山上的樹林被人砍得七零八落都心痛......
香港郊區真係好多美麗風光的, 希望d人唔好咁無良心不停去砍樹....
呢架船總站是黃石碼頭, 而中途站亦多是行山熱點,
唔想行餐死, 可以先坐船到某d接駁位再行, 應該會慳好多腳力~
因我下次都想試下先到荔枝莊行到深涌, 希望安排成功~
10點多就來到塔門碼頭了,
先來睇下地圖介紹先,
見環島行都好吸引, 不過爸爸講行半個島都夠啦,
因半個島是有美化的行山徑, 另一半是山路, 加上天氣好熱, 行住半個島先~
ok~ 那先由天后廟出發~~~
剛才和船長傾計時提過,
今年塔門有大醮慶祝, 是五十周年,
島上的原住民都由海外回來慶祝, 有粵劇, 有酒席,
所以好熱鬧~ 加上露營人士, 行山人士, hea人士, 熱鬧到似長州呀~
由碼頭沿路經過的村屋都在裝修, 睇來塔門會熱鬧起來~ 好比長州~~
如果想享受現有的小寧靜, 就快d在 [[ 平日 ]] 來行下~
呢度d原住民婆婆好好人, 放賣的冰菠蘿都只是$5, 解渴飲品都是$12, 仲有得任試!!
蝦干, 魷魚干都比大澳和長州干~
我們都幫襯了~~
由天后廟向上行會見指示, 我們選了先到觀景台, 即是疊石方向,
途經 YMCA青年會, 不過似荒廢好耐....
旁邊有一間瓊林學校, 都是荒廢了.....
樹林間好多呢集黃身蜘蛛, 不過我唔識咩名, 昆蟲小專人大寶說是::
不用15分鐘就來到觀景台了~
好好風, 好好太陽, 有好多小黃牛在食草,
大寶仲發現了一條蜈公, 不停追住來睇, 我心情好怕呢.........
但又要表現得好興奮的和他討論了一陣.... 怕怕.....
由觀景台向山上行就是龍景亭, 呢條小山徑修整得好好行,
不過不知是否背山, 所以無風, 焗得好辛苦,
加上低住頭來行, 一路都唔多覺樹旁有好多大大大隻的黃蜘蛛,
D網大到成個大寶咁大,
間唔中抬頭一望就見到大蜘蛛, 都嚇一跳!!!
就是在呢條山徑, 好多超大隻的蜘蛛, 上山唔多覺,
一落山就會見到兩旁d蜘蛛網多到不得了, 可以呢度無風, 所以d網才咁大,
難得一見的是見到一隻在開餐食緊蝴蝶, 2個曳人仔睇到唔願走....
焗到一身汗的我們, 終於都上到龍景亭啦, 立即爽哂, D風吹到"馮馮"聲, 正呀!!!!
如果想去塔門原始的一邊就可以在呢度行樹林的山路去,
行山裝備齊全的話, 應該不成問題,
但我們今日是 hea 遊人士, 涼鞋一族都係觀光好d~
再次回到觀景台, 睇下招牌相就去下一景點, 小石灘~
小石灘唔多乾淨, 好多垃圾, 不過2曳人都找到兩粒小石仔,
被海水沖刷得好滑,
呢度雖然多垃圾, 不過石灘d石好滑流, 應該海浪都幾大下~
而如果想去疊石, 可由小石灘向右方向行, 由石灘慢慢行到疊石, 近距離的觀賞~
涼鞋一族的我們不挑戰了, 行回行山徑慢步的行去疊石,
行了15分鐘後, 來到疊石了, 不過要行到好出的沿涯邊才睇到,
見到有人在下面曬太陽兼望海,
想一樣就要在小石灘沿海邊行, 穿波鞋應該好輕鬆~
想同個疊石合照, 就要沿行山徑再向前行,
中途有個小平地, 大家都是係呢度影相~
影完就完成塔門半島遊啦~
跟指示向碼頭方向就會經過榕樹村, 呢度就是做大戲搭哂台開大餐的地方,
想感受下可以係度食午餐.
不過我們選了回碼頭附近的食店, 因為"" 有冷氣 ""
試了個出名海膽炒飯和炸魷魚, 好新鮮~~~
噗飽冷氣和午飯, 仲趕得切坐13:45的船回馬料水,
今日天氣真係好好太陽, 好熱但有風, 唔錯~~
