細寶call我啦~

今早起身, 發覺周身骨痛....

之後個肚開始囉囉孌, 作肚痛,

諗住瞓多一陣才算,

點知就開始1個鐘嘅痛啦,

發覺唔多對路, 去個廁所之後仲見紅添!!

即時再check吓個走佬袋, ok!! 樣樣都齊啦,

等一陣食埋個午餐就入院~

細寶, 細寶, 邊得你咁早就來見我呀, 才38週多d~

由10月b變為9月b啦~

不過我都好想見你呢, 希望一切順利~

 

同爸爸打交呀!!!

今日留在家無走圍玩, 點知就出事啦......

話說baba同大寶好喜歡在床上玩大長轆, 由床頭轆到床尾,

咁今日如常在家玩到癲, 玩到傻啦,

點知玩玩吓大寶一個失手攬唔住張被, 就 "嘭" 一聲撞咗落個玩具桶度....

仲要係鐵個隻, 嘩....我哋呆咗2秒.... 即時抱起大寶....

點知已經喊到個口大一大, 但一d聲都無......

再抱佢緊一緊時, 就來料出聲啦, 真係喊到拆天咁大聲, 喘哂氣個隻.....

好彩只係撞傷咗個鼻樑, 流咗小小血...

但就嚇到baba面都青埋....

之後一整日都無理心機.....

咁我哋唯有安慰佢就同佢講

"唔係你嘅錯呀, 係baba接你唔住咋, 你無錯呀, 唔駛驚, "

到第2日返學時, 個個問起大寶個鼻咩事時?

佢都講 " 撞親lor, 同baba打交呀, baba接得唔住, 喊呀, 痛呀, "

哈哈, 明明係玩整親就講咗打交, 真係... 有d開始開事非嘅感覺.....

小b囡生日呀~

今日大寶去了小b囡同小弟弟嘅生日會~

由於倆姊弟只是相差幾日, 所以就一齊慶祝了,

呢個方法真好, 又熱鬧又可以慳返d,

睇見一大班小朋友在玩遊戲, 真係好開心,

加上請了攪手來帶小朋友玩, 熱鬧嘅氣氛都無停過, 玩得不知幾投入~

夾公仔

砌大大積木

釣金魚

 

 

晚上呀四又使走了去吞pop~

去了睇黃子華嘅舞台劇 " 男磨坊 "

身為佢fans就梗係要去睇啦,

呢套劇好睇之處就係3個大男人之間嘅友誼, 呢d題目通常都以女性為主, 今次睇男性做又幾得意, 大家個d死要面唔認衰, 真係睇到我笑唔停~ 一路睇就一路諗起我d豬朋狗友, 佢哋同劇入面d角色不多不少都幾相似, 真係睇得好開心~

而中場休息時就發覺都幾多藝人來捧場, 前排有好靚仔嘅智霖同袁靚靚, 真人真係好靚仔靚女@~@ 仲有好肥好肥嘅杜文澤同田麗芯, 不過更開心嘅係, 原來坐係我哋後面嘅竟然係型男三哥同戚美珍呀!!!! 三哥真係好man好型呀~

 

返學近況

今個星期大寶返咗3日學,

9月16日

今日大寶只係返了2個鐘, 因為又遲大到了, 10點半才到學校,

食完午飯12點幾我就接佢放學了, 老師今日讚佢叻叻, 明天可以試吓睡午覺,

好, 我一於放手試一試,

 

9月17日

有進步, 有進步, 今日10點就回到學校了,

中午仲係學校食埋午餐添, 不過老師講佢只係食生果, 無食飯,

午睡時候又嗲到老師抱住瞓, 老師嘗試放佢落床仔, 點知放3次都唔成功就醒哂無再瞓了,

茶點時候仲自己食哂1個饅頭, 曳人終於都知道肚餓, 有嘢食就要食啦, 哈哈, 抵死呀~

但今日就失禮死了, sh 濕了3條褲仔, 可能無人幫嘅關係, 而佢又未識自己除褲, 結果就濕完又濕.....

不過我接佢放學時都係開心嘅~

 

9月18日

曳人今日午餐都係食得好少, 好少,

而午睡時更得到校長嘅特別招待, 抱佢瞓咗一陣, 但都係唔肯瞓落床,

但就有小進步, 今日無 sh 濕褲仔,

婆婆接放學時, 陳老師講返食茶點時候嘅對話>>

陳老師 "老師請你食餅仔, 好唔好?"

大寶 " 我食一半, 你又食一半呀, 好唔好呀?"

咁啱有其他老師經過, 又問大寶 " 請唔請我食呀?”

大寶 " 我聽日先請你食啦, 得1塊咋.." 哈哈, 咁枯寒,

咁陳老師就叫佢, 聽日記得要返學講其他老師食啦~

點知.....19號就瞓過頭.....無返學...

 

9月19日

今日我8點就叫大寶起身啦, 返學啦, 點知就賴死唔起身,

要成9點9先起身, 唉.... 我見咁遲就算了..

點知在睡午覺時, 大寶不打自招, 講咗自己嘅曳行為出來,

無拿拿大叫 " 老師叫你唔好推人, 你又推啦~ "

呀!!! 原來大寶有時唔想返學嘅原因就係比老師鬧!!

之前在協康時, 都出現過類似情況,

大寶成日都講唔鍾意Macy姐姐呀....

我問佢點解時, 佢就講 " Macy 姐姐鬧我玩水喉lor.."

oh~ 自己曳, 比人鬧, 仲要搵藉口, 你真係好曳, 要同佢訓話了~

 

 

古靈精怪無時停

曳人真係愈大愈曳人, 個樣仲成日古靈精怪, 表情多多~

早上一出街就要去傳聖火啦, 真係無佢符....

不過想深一層, 佢呢d咁跟本性而做嘅行為,

再大2,3年就唔會做啦, 到時會怕怕羞羞, 無咁天真啦!! 都係隨佢吧~

搭搭吓車, 又情深款款咁望住我, 仲同我講 "媽咪, 我好錫你o架~

"

真係, 真係, 頂你唔住,

有時仲會無拿拿攬住我同baba講 "我好掛住你呀~

"

真係, 真係, 甜到成個人都溶咗~

呀四在此同你講 "大寶呀, 大寶, 呢d說話要講多d呀~ "

講完又整個 "囧" 表情比我嘆吓~

都係 "麵包超人" 樣啱你d~

近排至愛post之1 " 舉起2隻手指, 再講yeah~

"

大寶對所有廚房 & 廁所用具都十分有研究~

係十蚊店玩到唔願走!! 都唔明有咩咁特別吸引??

 

迎月兼傳聖火??

一年容易又中秋~ 話咁快又一年了~

食完簡簡單單嘅晚飯之後, 就落海濱湊熱鬧囉

由第一年抱住去賞月, 到上年自己行, 而今年就踏住單車去,

真係一年比一年多o架生, 眼見大寶在睇奧運時對火炬嘅熱情, 咩都當火炬咁舉一餐, baba就買了個閃閃火炬比大寶過吓癮~

今晚大寶連燈籠都唔記得帶, 就拿住個火炬衝落街, 可想而知佢幾咁貪新鮮

 

個曳人開心到拿住聖火扮蟹咁打橫走, 終於就趺咗落地...

行行吓見到有位姐姐係度吹泡泡波, 又厚面皮哋加入了~

仲玩得鬼c咁開心, 之後又有位姐姐同哥哥加入, 結果4個係度玩到唔願走,

原來要開心就係咁簡單, 有得落街就得啦~

~上年中秋節目~

 

迎月買燈籠

話咁快又到中秋啦, 咁啱今日商場有檔口賣燈籠,

就同大寶買番個心水燈籠應應節啦~

好彩呢檔賣嘅燈籠, 並唔係有嘈音樂嘅款式,

所以可以慢慢選都唔覺煩~

仲有好多懷舊款添,

本以為大寶一定會選飛機, 金魚,

點知就選了兔仔, 曳人心真如海底針呀!! 

得到心頭愛就在商場閒逛示眾一番,

曳人仲以為隻兔仔嘅轆會自己轉, 會自己行,

不停放落地向前拉, 哈哈~ 正一傻蛋豬~

返到屋企仲要抱住一齊瞓添~