學堂畢業啦~

話咁快, 返了一年既 "開心樂園" pg, 終於都完結啦~

好唔捨得呢........

而今日我哋還舉行了個小型畢業禮, 係由Macy姐姐派發畢業証書, 

而大寶一見到我入來課室就開始失控啦..... 由本來坐得定一定變為不停走來走去, 所以係無一張正正經經既畢業相...

不過就笑得好甜~

之後, 就到最精彩既節目啦, 原來Macy姐姐教了他們一隻絲帶舞,

為了今日既表演, 我想咁多位小朋友都練習得很用心, 表演時仲好有節奏感添~ 不過大寶都係唔多夠耐性, 跳到一半就攪攪震周圍走, 仲同同學仔換位添... 真係, 自己曳就好啦, 仲要影響埋人哋....

來來~ 去片!! 睇睇大寶既舞姿吧~

 

睇番Macy姐姐為大家做既小相冊, 我真係覺得呢個機構好細心同窩心, 雖然不是十分特別, 但我都會好好保存, 日後一定會講番比大寶知, 佢曾經上過一個咁好既pg,

呢一年所學到既, 係我想像唔到咁多, 好似大寶由一個貼身膏藥變為可以自己完成一堂, 由穿片片變為一定唔要穿才肯去街街, 由一定要陪住食到可以自己畢嘢食, 呢d自理能力都係在學堂到學番來, 還有就是學會排隊和同同學仔分享,

大寶漸漸咁長大啦, 要再進入另一階段了,

期待9月份既來臨, 新既環境, 新既老師, 新既課室, 新既同學, 等待著我同大寶去嘗試, 去體驗呀~

還有就是10月既新成員呢, 呵呵~

 

奀豬生病了........

 

近日....... 喜歡左戚右戚雙眼既奀豬得了眼疾......

聽e生講是年老既關係, 神經線退化了, 所以一隻眼球縮小了,

好彩既係, 奀豬並不會感覺到痛, 只會睇野時不太能對到焦點, 生活依舊, 而我哋就只得靜待佢自然康復,

今日大寶探完奀豬時,

回家同我講 " 奀豬病病唔舒服, 要睇e生呀 "

跟住又講 " 奀豬唔舒服, 我比餅餅奀豬食~ "

我聽到後好開心, 因為大寶大個仔啦, 識得關心我哋之餘都識關心其他事, 原來兩個已在不知不覺間建立咗感情,

我唯有安慰大寶, 講奀豬會好番o架, 好番之後就一齊去行山, 去游水, 因為我應承過大寶今年夏天一齊去玩既, 但e+就要等奀豬好番d才可成事了.....

奀豬, 奀豬, 快d好番啦, 我都好擔心你o架.....

 

我唱歌，你要聽！

真係不得不相信廣告既影響力，近掛有個糖果廣告歌就係唱”星仔走天涯”主題曲，大寶一聽就入咗腦，繼而叫我地教佢唱，每日回家仲要開電腦比佢當ＣＤ咁聽，是”生日歌”之後既第２至愛新歌！

今日，我地食緊飯既時候，大寶又大展歌喉啦，拿住支咪仔走圍走，走圍唱，仲要我哋掌聲鼓勵．．．真係無佢符，不過講真真係唱得好求其o架.....

~己換有聲版本~

好!好!好!好戲”赤壁”

今日去了睇戲，

”赤壁”真係好好睇～　特別是對男仔來講，真係一套好好既戲，三國既題材真係可以拍足十年，唔知有無導演夠薑去做呢？

係戲入面我特別喜歡做曹操既演員｛張豐毅｝，個種霸氣，神韻，”正”其次是張震同胡軍，不知何解，我總覺得內地演員既感覺，做得比梁朝偉好，不知關不關配音事？其他女演員都算選啱人，兩位都好切合，林志玲既嬌柔，趙薇既豪邁，係眾多男演員中都算有睇頭．

點都好，呢套戲真係好值得去戲院睇，千期唔好在屋企睇ＤＶＤ，係兩回事！！

＊＊＊＊＊＊＊＊

在此我推介一本好漫畫”火鳳燎原”，又是講三國既故事，作者既想像力真係好好，佢將野史同正史互相文配表達，真係睇得好過癮～　

新玩具"直昇機"

好耐無買新玩具了～

呢幾個月都係買圖書多，所以周日去反斗城行街街時，本想買單車既，點知大寶睇都唔睇，玩都唔玩就走咗去睇飛機，仲不停問哥哥ｄ飛機點飛？又叫ｂａｂａ同佢玩，咁．．呢兩個大細路就即刻挑選啦，

ｂａｂａ一回家就即刻玩啦，仲自言自語講自己細個時都好恨有架搖控直昇機，ｅ＋終於都恨到，不過就多咗個曳人同佢爭，而ｂａｂａ仲要係爭輸個嗰．．．．

第日細寶都識玩既時候，ｄ玩具真係爭崩頭都似．．．．

~已換了有聲版~

啫喱~啫喱~ "我愛你"

近排大寶同我講，佢牙仔痛．．．．無胃口喎！！

咁我見佢連至愛既生果都唔肯食，飯又唔食．．有理無理都要想辦法...

咁唯有用ｄ凍o野來引吓佢，令佢ｄ牙肉舒服ｄ～

但佢條敏感氣管又唔食得太凍既食物，咁我就諗起”啫喱”啦，

嘩！！唔食由自可，一食就一發不可收拾，愛到跳哂舞～

呢隻”為食舞”係舅父教佢既，曾經是為了食杏仁餅而跳，

而大寶跳起上來真係好似好似”蠟筆小新”，個曳人樣出哂來呀！！

 

好習慣 ( 1 )

講完壞習慣就緊係講吓好習慣啦，而大寶既好習慣其實都係得兩樣，

就係”睇圖書”同主動”食生果”啦～

咁．．身為講古呀四，要令大寶聽眾投入既，

就當然要時常入ｄ新貨來充牚場面，

近來就係親子洋同當當網度入咗ｄ新書，大寶見到咁”正”既圖書，就不停叫我陪睇啦～

呵呵～　呢ｄ咁好既角色我當然要做啦

呢本新寵｛毛毛虫圖書｝就係呢期至愛～

第２新寵就係有車轆既小書仔～

而呢４本書就係日日都要睇一睇既必讀書，特別係前面個２本”哥哥書”

呢套無字書，本想留比細寶既，估唔到大寶都好喜歡，不過就幾考我既想像力，要將小小既圖畫講到好精彩都幾係野

湯姆系列既書好正，個個單元都有機會發生係大寶身上，所以佢都睇得幾投入

至於呢套書就內容來講就普普通通，但在大寶眼中又係一套好書，因為有好多”車”同Ｄ圖畫好吸引到佢，有貓，兔仔，豬仔，羊仔，好多動物，係食飯時既必備品

呢套書既吸引度暫時並未能發揮到，不過我諗大寶好快就會注意到佢o架啦

大寶好喜歡”小熊布迪”架，不過睇來睇去都係一本｛來洗頭｝點解咁獨枯一味既

壞習慣

自問自己都有好多壞習慣．．．．只是係大寶面前都收歛咗，

但ｂａｂａ就一ｄ警覺性都無，一直都無咩點去避重就輕，依然生活得好自我，

好似係大寶面前食住薯片睇電視，飲氣水，食好多唔同款式既零食，雪條，而呢ｄ只係食既影響，

至於其他就有成日打機，睇雜誌，睇電視，上網．．．雖然我都知返工好辛苦，但．．．可唔可以陪佢玩其他玩具多ｄ呢？就係咁，大寶對打機都開始有興趣啦．．．兩父子仲要一齊打添，又一次証明，”仔”係對ｂａｂａ既所作所為，係十分之留意兼有樣學樣既，大寶愈大就愈愛痴住ｂａｂａ，哈哈～　而我．．．就樂得清閒一陣～

 

攝影大師

不知是不是見得ｂａｂａ影自己影得多，大寶一直對相機都好有興趣，由細細個就開始幫ｂａｂａ手，清潔鏡頭，裝電池，換鏡，咩都要幫一餐，

跟住就用我部手機影我，近排開始覺得無咩難度了．．．就轉用細相機亂影一通，不過都係玩咗一陣又覺得無咩大興趣了．．．．

終於，就去挑戰ｂａｂａ既大相機，一機在手即時醒神哂，真係好認真咁去開機，對眼仔，然後去禁制影相，一ｄ都無馬呼求其，而影出來既效果都唔錯，

不過ｂａｂａ暫時都唔肯放手比佢係街影，因為怕佢一唔夠力就放係地下，咁．．．．佢既舊愛就會花，而只所以佢肯比部機大寶玩都係因為．．．．ｂａｂａ有另一部新歡代替，

哼～　兩父子都是貪新忘舊之人．．．

 

兩個硬頸人

落了成幾個星期雨之後，成班小朋友又可以在放學後去公園仔玩一陣啦，話咁快呢個”開心學堂”就要完結啦，大家都要各自上唔同既幼稚園，有ｄ唔捨得呢．．．

在幾個小朋友當中，大寶同謙謙同天熱係最老友既，今日大寶同謙謙在ｓｉｒ滑梯時就發生咗件硬頸事件．．．

謙謙好乖咁想ｓｉｒ落，但曳人寶就反方向向上爬，兩個相遇之時就各不相讓，仲你又出手我又出口不停爭啦．．．．結果都係不分高下，由媽咪出手分開佢地，睇到佢地咁，又令我諗，日後返學時爭玩具爭先後既情況，大寶會唔會都係咁堅持？咁硬頸？好擔心．．．　但老師都講過，要放手，要比機會佢地成長，咁．．．．我都要學習吓啦，哈哈～大寶成長既同時，我都要再成長啦～

合拍的大細寶

近來，細寶在我肚內打功夫既次數日漸增加，

特別在晚上我瞓得最甜最熟睡既時候，特異奇來既幾下飛腳，令我即時醒一醒，

點知雙手摸吓個肚時發覺有隻腳仔ｌｏｎｇ住係我肚上，原來個大寶豬同細寶在發緊夢既時候都可以打交！！！兩隻曳人豬你一腳我一腳咁互片緊，可憐我就咁比佢地大大腳咁踢醒咗．．．．

呢ｄ心靈相通既情況，除咗在瞓時，仲有就在食飯既時候，

大寶對食一直都係提唔起勁兼成日想周圍走既，咁我就不停同佢講故事書引佢坐定定，蝦．．．．好衰唔衰，次次我講故事既時候，細寶又在肚內不停東一腳西一拳咁郁來郁去，真係救命呀！！！兩個夾埋一齊？可惡呀～

有時大寶實在太想我抱時，就會成隻八爪魚咁夾實我，我講話會整到細寶呀，大寶竟然答我，抱一陣之ｍａ，你抱高ｄ咪得ｌｏｒ，唉．．．

第日對住兩隻馬騮既日子點算？？

 

不過．．．一擔沙塘一擔屎，

大寶有時又會好乖好ｓｗｅｅｔ既，好似食蛋糕食剩幾啖既時候就會講留比細寶ｏ架，都唔知真係咁乖定搵藉口唔食埋佢？？

晚上睡前讀圖書又會攬住我個肚，講細寶係入面呀？咁唔好郁啦，坐係度啦～

去街想抱時，走去ｂａｂａ度，話媽咪唔抱得喎，你抱呀！

我偷懶瞓係梳化時，就算同姐姐玩得幾開心，都會走埋我身邊講比我知，講我扮緊咩呀，玩緊咩呀咁，好似向上司報告，又會問我你唔舒服呀？人細鬼大～

看似細微細眼既小事，但我都會甜在心～